Kryeministri i ardhshëm i Hungarisë, Péter Magyar, ka deklaruar se tubacioni “Druzhba”, që transporton naftë ruse përmes Ukrainës, duhet të rihapet nëse është në gjendje funksionale, duke theksuar se Evropa nuk duhet të pranojë presione në këtë çështje.
Duke reaguar ndaj raportimeve për rifillimin e mundshëm të furnizimeve me naftë në këmbim të një huaje prej 90 miliardë eurosh për Ukrainën, Magyar tha se kjo “nuk është lojë”.
Ai tha se, nëse tubacioni është funksional, atëherë duhet të rihapet dhe se edhe Rusia duhet të sigurojë furnizimet përmes tij.
“Unë nuk do t’i këshilloja presidentit ukrainas të shkojë në atë rrugë. Jo vetëm Hungaria, por e gjithë Evropa do ta refuzonte këtë,” tha ai.
Magyar shtoi se Hungaria nuk do të dorëzohet ndaj presioneve dhe se marrëveshjet e mëhershme nuk duhet të rihapen.
Ai foli edhe për Gjykatën Ndërkombëtare Penale (ICC), duke thënë se Hungaria do të mbetet pjesë e saj dhe do të respektojë detyrimet ligjore ndërkombëtare.
Magyar gjithashtu prezantoi planin për zhbllokimin e fondeve të BE-së për Hungarinë, duke përmendur reforma në luftën kundër korrupsionit dhe lirinë e medias si kushte kryesore. /Euro News/
