Vushtrria ka kurorëzuar me sukses rikthimin në elitën e futbollit kosovar, pasi siguroi inkuadrimin në Superligë dhe njëkohësisht fitoi titullin kampion në Ligën e Parë.
Skuadra vushtrriase triumfoi me rezultat 1-3 ndaj Vëllaznimit në Gjakovë, fitore që vulosi sezonin fantastik të klubit dhe rikthimin në mesin e më të mirëve në futbollin kosovar.
Megjithatë, momentet më emocionale erdhën disa ditë pas festës së titullit.
Pjesëtarët e grupit të tifozëve “Forca” vizituan varrin e ish-futbollistit të Vushtrrisë, Erjon Morina, duke marrë me vete edhe trofeun e kampionit.
Me këtë veprim prekës, tifozët deshën të nderojnë kujtimin e ish-lojtarit, i cili vazhdon të mbetet i paharruar për klubin dhe qytetin.
“Misioni u krye, Erjon! Pusho i qetë”, shkruhej në postimin e grupit “Forca” në rrjetet sociale, një mesazh që preku zemrat e shumë tifozëve dhe sportdashësve në Kosovë.
