Gjashtëmbëdhjetë nxënës janë vrarë në një zjarr në një shkollë me konvikt në Gilgil, rreth 120 km (77 milje) në perëndim të kryeqytetit kenian, Nairobi, u tha një polic gazetarëve në vendngjarje.
Shtatëdhjetë e katër studentë të tjerë po trajtohen në spital pasi u plagosën, shtoi ai.
Zjarri në shkollën e vajzave Utumishi filloi në orët e para të mëngjesit të së enjtes, kur nxënëset ishin në gjumë, sipas Kryqit të Kuq të Kenias dhe policisë.
Policia tha se operacionet e kërkim-shpëtimit ishin duke u zhvilluar, ndërsa autoritetet ende nuk e kanë përcaktuar shkakun e zjarrit. Kryqi i Kuq i Kenias tha se ekipet e emergjencës ishin në terren për të ofruar mbështetje, shkruan BBC, transmeton Klankosova.tv.
“Është një situatë e trishtueshme dhe shqetësuese”, tha komandanti i policisë Masoud Mwinyi, duke folur me prindërit dhe turmat jashtë shkollës.
Zjarret nuk janë të rralla në shkollat me konvikt në Kenia, me disa incidente vdekjeprurëse të raportuara vitet e fundit. Mbipopullimi në konvikte dhe mosndjekja e udhëzimeve të sigurisë janë fajësuar shpesh për numrin e lartë të viktimave.
Sipas policisë, zjarri shpërtheu rreth orës 01:00 sipas orës lokale (22:00 GMT të mërkurën) dhe përfshiu një bllok konviktesh ku ndodheshin rreth 220 studentë.
