Inter Milan e ka mbyllur sezonin me një barazim dramatik 3-3 ndaj Bologna FC 1909, në një ndeshje të mbushur me kthesa, gola spektakolare dhe gabime të pazakonta në kuadër të kampionatit italian.
Skuadra e trajnerit Cristian Chivu kishte siguruar më herët “dopietën” Scudetto dhe Coppa Italia, prandaj në këtë përballje u lanë pushim disa prej lojtarëve kryesorë si Hakan Çalhanoglu, Marcus Thuram, Manuel Akanji dhe Denzel Dumfries.
Nga ana tjetër, edhe Bologna zbriti në fushë pa disa emra të rëndësishëm si Riccardo Orsolini dhe Nicolo Cambiaghi, por pavarësisht mungesave, vendasit arritën të zhvillonin një ndeshje me ritëm të lartë dhe shumë intensive.
Interi kaloi i pari në epërsi me një goditje të lirë fantastike nga Federico Dimarco, i cili vazhdon të konfirmohet si një nga mbrojtësit më produktivë në Evropë sa i përket golave dhe asistimeve.
Megjithatë, Bologna reagoi shpejt dhe arriti ta përmbyste rezultatin para përfundimit të pjesës së parë, përfshirë edhe një autogol të pazakontë të Piotr Zielinskit. Për vendasit realizuan Federico Bernardeschi dhe Tommaso Pobega, duke e kthyer ndeshjen në favor të tyre.
Në pjesën e dytë, Interi u rikthye fuqishëm në lojë me golin e Andy Diouf, i cili më pas shënoi edhe një realizim spektakolar për të barazuar shifrat në 3-3. Zikaltrit gjithashtu përfituan nga një gol i Francesco Pio Espositos, pas një aksioni të nisur nga Diouf.
Bologna kishte raste të tjera të rrezikshme me Santiago Castro dhe Bernardeschi, por nuk arriti ta konkretizonte fitoren në minutat e fundit të takimit.
Në fund, ndeshja u mbyll 3-3, duke shërbyer si një përmbyllje simbolike e një sezoni të gjatë dhe të suksesshëm për Interin, i cili e përfundoi kampionatin me 87 pikë, ndërsa Bologna u rendit në vendin e tetë me 56 pikë.
