Norvegjia ka shkruar histori në Kupën e Botës, duke siguruar për herë të parë kualifikimin në çerekfinale pas një fitoreje dramatike 2:1 ndaj Bregut të Fildishtë.
Heroi i mbrëmjes ishte Erling Braut Haaland, i cili shënoi golin vendimtar në momentin kur sfida dukej se po shkonte drejt vazhdimeve.
Norvegjezët e nisën takimin me ritëm të lartë dhe Haaland krijoi rastin e parë që në minutat e para, por nuk arriti ta mposhtte portierin Yahia Fofana.
Nga ana tjetër, Bregu i Fildishtë reagoi mirë dhe me kalimin e minutave mori kontrollin e lojës, duke iu afruar golit përmes Nicolas Pépé dhe Ghislain Konan.
Kur pritej që pjesa e parë të mbyllej pa gola, Antonio Nusa zhbllokoi sfidën me një goditje të bukur nga krahu i majtë, duke i dhënë epërsinë Norvegjisë pak para pushimit.
Në pjesën e dytë, përfaqësuesja afrikane rriti presionin dhe krijoi disa raste të mira, ndërsa portieri Ørjan Nyland u detyrua të bënte disa ndërhyrje vendimtare. Norvegjia ishte pranë golit të dytë, por Torbjørn Heggem u ndal mbi vijën fatale nga Amad Diallo.
Pikërisht Diallo u shndërrua më pas në protagonist për Bregun e Fildishtë, duke realizuar një gol spektakolar pas një depërtimi individual, që riktheu baraspeshën dhe u konsiderua menjëherë një kandidat serioz për golin më të bukur të turneut.
Megjithatë, festa e afrikanëve zgjati pak. Në momentin kur ndeshja po hynte në fazën vendimtare, Erling Braut Haaland përfitoi nga një asistim i Patrick Berg dhe e dërgoi topin në rrjetë për rezultatin 2-1, duke vulosur kualifikimin historik të Norvegjisë.
Në minutat e fundit, Bregu i Fildishtë u përpoq të rikthehej edhe një herë në lojë, por Nyland ruajti qetësinë dhe devijoi mbi traversë një goditje të rrezikshme dënimi të Amad Diallo, duke mos lejuar surpriza.
Me këtë fitore, Norvegjia regjistron triumfin e parë në histori në fazën me eliminim direkt të Kupës së Botës dhe siguron një vend në çerekfinale, ku do të përballet me Brazilin e drejtuar nga Carlo Ancelotti.
Nga ana tjetër, Bregu i Fildishtë i jep fund aventurës në turne, por largohet me krenari pas paraqitjes më të mirë në historinë e tij në Kupën e Botës, pavarësisht se nuk arriti të konkretizojë dominimin në disa momente kyçe të sfidës.
