Suedia tha të enjten se planifikon të prezantojë byzylykë elektronikë për të monitoruar fëmijët në rrezik rekrutimi nga bandat kriminale, masa e fundit e qeverisë që synon të godasë dhunën vdekjeprurëse të bandave.
Autoritetet do të jenë në gjendje t’ua caktojnë byzylykët fëmijëve dhe të rinjve të moshës 13 vjeç e lart, tha qeveria, duke vlerësuar se rreth 50 deri në 100 të rinj do të monitorohen për t’u siguruar që ata po respektojnë orët e shtetrrethimit të vendosura nga shërbimet sociale, shkruan Euronews.com, transmeton Klankosova.tv
Bandat kriminale në Suedi rekrutojnë gjithnjë e më shumë fëmijë dhe të rinj për të kryer vrasje dhe akte të tjera të dhunshme, duke e ditur se nuk do të përballen me burgim nëse kapen, pasi mosha e përgjegjësisë penale deri më tani ka qenë 15 vjeç.
Që nga 1 korriku, mosha do të ulet në 13 vjeç, për krime të dënueshme me të paktën katër vjet burg.
Byzylyku elektronik do të projektohej të dukej “si një orë dore ose byzylyk, kështu që nuk do të ishte aq i dukshëm ose stigmatizues” sa një byzylyk kyçi i këmbës që përdoret për kriminelët e dënuar, u tha gazetarëve Ministrja e Shërbimeve Sociale Camilla Waltersson Gronvall. /Klankosova.tv
