Policia e Kosovës ka realizuar me sukses aktivitetet operacionale në kuadër të planit ‘ROADPOL’ për muajin qershor 2026, me fokus të veçantë në kontrollin e shoferëve për përdorim të alkoolit gjatë drejtimit të automjeteve.
Sipas të dhënave të policisë, aktivitetet janë zhvilluar nga 15 deri më 21 qershor në të gjitha rrugët e vendit, me qëllim të rritjes së sigurisë në trafikun rrugor dhe parandalimit të aksidenteve, transmeton Klankosova.tv.
Gjatë kësaj periudhe, njësitë e trafikut kanë realizuar gjithsej 861 pika kontrolli, ndërsa janë kontrolluar 644 shoferë. Nga këto kontrolle, 27 shoferë kanë rezultuar nën ndikimin e alkoolit, ndaj të cilëve janë ndërmarrë masat ligjore të parapara.
Një nga aktivitetet kryesore të javës ishte edhe “maratona” e kontrollit të alkoolit, e organizuar më 19 qershor. Gjatë këtij operacioni, policia identifikoi një shofer që drejtonte automjetin me 1.11 promila alkool në gjak, duke rrezikuar sigurinë në trafik. Ndaj tij janë ndërmarrë menjëherë masat ligjore përkatëse.
Policia thekson se drejtimi i automjetit nën ndikimin e alkoolit mbetet një nga faktorët kryesorë të rrezikut në komunikacion, duke cenuar jo vetëm jetën e shoferit, por edhe të pasagjerëve dhe përdoruesve të tjerë të rrugës.
Ndaj autoritetet u kanë bërë thirrje të gjithë pjesëmarrësve në trafik që të respektojnë rregullat e komunikacionit dhe të mos drejtojnë automjetet pas konsumimit të alkoolit.
“Çdo vendim për drejtim nën ndikim të alkoolit paraqet rrezik për shoferin, pasagjerët dhe përdoruesit tjerë të rrugës! Andaj, mos drejtoni automjetin nën ndikim të alkoolit!”.
