Kina dhe Rusia kanë dënuar vendimin e Shteteve të Bashkuara për të ngritur akuza për vrasje ndaj ish-presidentit kuban, Raúl Castro.
Ministria e Jashtme kineze i bëri thirrje SHBA-së që të ndalojë përdorimin e “detyrimit” dhe “kërcënimeve” ndaj aleatit të saj, ndërsa Kremlini tha se presioni ndaj Havanës “i afrohet dhunës”.
SHBA-ja e akuzon Castron për rrëzimin e dy avionëve në vitin 1996, incident ku mbetën të vrarë katër persona dhe që nxiti tensione diplomatike mes Uashingtonit dhe ishullit karaibik.
Presidenti amerikan, Donald Trump, ka kërkuar vazhdimisht të rrisë presionin ndaj Kubës dhe ka folur hapur për rrëzimin e regjimit komunist atje.
Shtetet e Bashkuara kanë vendosur sanksione të reja ndaj Kubës dhe kanë bllokuar në mënyrë efektive dërgesat e naftës drejt vendit, duke përkeqësuar krizën e karburanteve dhe duke shkaktuar ndërprerje të gjata të energjisë elektrike dhe mungesa ushqimore.
Zëdhënësi i Kremlinit, Dmitry Peskov, deklaroi për mediat shtetërore ruse se fushata e presionit amerikan ndaj aleatit të kahershëm të Rusisë “nuk mund të arsyetohet”.
“Ne besojmë se në asnjë rrethanë nuk duhet të përdoren metoda të tilla – që i afrohen dhunës – kundër ish-udhëheqësve apo udhëheqësve aktualë të shteteve”, tha ai.
Më herët, zëdhënësi i Ministrisë së Jashtme kineze, Guo Jiakun, tha se SHBA-ja duhet “të ndalojë kërcënimet me forcë në çdo rast”, duke shtuar se Pekini “e mbështet fuqishëm Kubën”, raporton BBC.
