Ushtria e Tajvanit do të zhvillojë një stërvitje pesë-ditore të gatishmërisë luftarake këtë javë, tha të dielën ministria e mbrojtjes, si pjesë e planeve të modernizimit për të zhvendosur fokusin e stërvitjes në ushtrime më realiste që simulojnë luftën, larg ngjarjeve të planifikuara.
Tajvani, të cilin Kina e pretendon si territor të vetin pavarësisht kundërshtimeve të qeverisë në Taipei, thotë se forcat e armatosura të Kinës operojnë rregullisht në qiell dhe det përreth ishullit në një përpjekje për ta ushtruar presion që të pranojë sovranitetin kinez, shkruan Reuters, transmeton Klankosova.tv.
Ushtria e Tajvanit ka filluar të bazojë disa nga stërvitjet e saj në një skenar në të cilin Kina papritmas e shndërron një nga ushtrimet e saj të rregullta rreth ishullit në një sulm të vërtetë.
“Stërvitja e Gatishmërisë së Menjëhershme Luftarake” do të fillojë të hënën dhe do të zgjasë deri të premten, tha ministria e mbrojtjes në një deklaratë, duke e përshkruar stërvitjen si pjesë të planeve vjetore të trajnimit në operacionet e përbashkëta për forcat e armatosura.
