Presidenti amerikan Donald Trump ka thënë se po e shtyn një sulm ushtarak ndaj Iranit që ishte planifikuar për të martën, me kërkesë të vendeve të Gjirit, pasi “po zhvillohen negociata serioze”.
Në një postim në Truth Social, ai tha se këtë kërkesë ia kishin bërë udhëheqësit e Katarit, Arabisë Saudite dhe Emirateve të Bashkuara Arabe.
Trump tha se ishte informuar se do të arrihet një marrëveshje që është “shumë e pranueshme” për SHBA-në, duke shtuar se “NUK DO TË KETË ARMË BËRTHAMORE PËR IRANIN!”
Por ai paralajmëroi se ushtria amerikane do të jetë e gatshme të “kalojë në një sulm të plotë dhe në shkallë të gjerë ndaj Iranit, në çdo moment”, nëse nuk arrihet një marrëveshje e pranueshme.
Irani nuk ka komentuar publikisht deklaratën e fundit të Trumpit.
Forcat izraelite dhe amerikane filluan sulme masive ajrore ndaj Iranit më 28 shkurt, ndërsa Teherani u kundërpërgjigj duke lëshuar dronë dhe raketa ndaj objektivave izraelite dhe amerikane në vende të ndryshme të Gjirit.
Një armëpushim i arritur në prill, që synonte të lehtësonte bisedimet, është respektuar në përgjithësi, pavarësisht shkëmbimeve të herëpashershme të zjarrit, raporton BBC.
