Avionët izraelitë kanë nisur sulme të reja ndaj Iranit, tha të martën zëdhënësja e ushtrisë Efi Defrin.
Defrin tha se “60 avionë po sulmojnë tani zonën në Iran nga e cila u lëshuan shumica e raketave drejt Izraelit, duke përfshirë 12 vende nëntokësore në Teheran”, transmeton Anadolu Agency.
Ai pretendoi se “forcat e regjimit iranian janë shtyrë në qendër të vendit falë sulmeve të Forcave Ajrore Izraelite”.
Defrin pretendoi se “dhjetëra avionë të Forcave Ajrore po patrullojnë vazhdimisht qiellin mbi Isfahan, duke identifikuar kërcënimet në kohë reale dhe duke sulmuar”.
Shpërthime intensive dhe të vazhdueshme u dëgjuan më parë në Teheranin perëndimor dhe qendror, sipas agjencisë iraniane të lajmeve Mehr.
Tensionet rajonale janë përshkallëzuar që nga e premtja, kur Izraeli nisi sulme ajrore të koordinuara në vende të shumta në të gjithë Iranin, duke përfshirë objektet ushtarake dhe bërthamore, duke bërë që Teherani të nisë sulme hakmarrëse.
Autoritetet izraelite thanë se të paktën 24 persona janë vrarë dhe qindra të plagosur në sulmet me raketa iraniane që nga e premtja.
Irani, nga ana e tij, tha se të paktën 224 persona janë vrarë dhe më shumë se 1,000 të plagosur në sulmin izraelit.
