Një 16-vjeçar është arrestuar dhe akuzohet për vrasjen e motrës dhe vëllait brenda shtëpisë së tyre në zonën e Gwynn Oak, në qarkun Baltimore, në shtetin amerikan të Maryland.
Sipas Policisë së Qarkut Baltimore, Keith Maurice James Jr., 16 vjeç, përballet me dy akuza për vrasje të shkallës së parë dhe një akuzë për përdorim të armës së zjarrit. Edhe pse është i mitur, ai do të gjykohet si i rritur, raporton ABC News, transmeton Klankosova.tv.
Viktimat janë Steve Allen, 9 vjeç, dhe motra e tij Giovanna Myrie, 15 vjeçe, të cilët u gjetën të pajetë më 7 korrik në banesën e tyre. Ishte nëna e fëmijëve ajo që zbuloi trupat e tyre dhe njoftoi menjëherë shërbimet e emergjencës.
Shefi i Policisë së Baltimore County, Robert McCullough, deklaroi se hetimet zbuluan se i dyshuari kishte qenë më parë në shtëpinë e viktimave. Sipas dokumenteve të gjykatës, ai kishte kaluar kohë me Giovanna Myrie disa ditë para krimit dhe ishte parë me një armë zjarri.
Hetuesit arritën ta identifikonin të dyshuarin përmes dëshmive të dëshmitarëve, analizës së të dhënave të telefonit celular dhe pamjeve të kamerave të sigurisë.
16-vjeçari mbahet aktualisht në paraburgim pa të drejtë lirimi me kusht, ndërsa deri tani nuk është bërë i ditur nëse ai ka angazhuar një avokat mbrojtës.