Tiktokerja Brooke George, 23 vjeç, akuzohet se ka therur për vdekje një britanik 26-vjeçar pasi udhëtoi për ta takuar atë në Emiratet e Bashkuara Arabe.
Ish-punonjësja e dyqanit John Lewis nga Gravesend pretendon se ishte abuzuar vazhdimisht prej tij dhe se gjatë një sulmi mori një thikë kuzhine për t’u mbrojtur, shkruan Metro, transmeton Klankosova.tv.
Familja e Brooke po përpiqet me dëshpërim të mbrojë çështjen e saj, mes frikës se ajo mund të përballet me pushkatim nëse shpallet fajtore.
Nëna e saj, Thereza George, tha: “Jam thellësisht e shqetësuar për gjendjen e saj. Vajza me të cilën fola atë natë ishte jashtëzakonisht e tmerruar. Besoj fort se ajo po përpiqej me dëshpërim të kthehej në shtëpi dhe të largohej nga gjithçka që kishte ndodhur”.
Burri për vrasjen e të cilit Brooke akuzohet është William Treeby, gjithashtu nga Kent.
TikTokerja u arrestua teksa po përpiqej të hipte në një fluturim për t’u kthyer në Britani dhe u akuzua për vrasje me paramendim.
Sipas Detained in Dubai, Brooke e njohu të dashurin e saj në Facebook dhe udhëtoi drejt Dubait për ta takuar.
Vizita e parë njëjavore u përshkrua si pozitive, por sjellja e tij thuhet se ndryshoi “në mënyrë dramatike” gjatë vizitës së dytë, kur ai u bë “kontrollues dhe abuzues”.
Brooke pretendon se 26-vjeçari u deh dhe e “sulmoi” atë në zonën e Jumeirah Village.
Influencuesja kontaktoi familjen e saj në gjendje paniku pasi pretendon se ishte “goditur vazhdimisht me grushte” dhe organizoi një fluturim për t’u kthyer në shtëpi me ndihmën e miqve. Megjithatë, kur u kthye në apartament për të marrë pasaportën, ajo pretendon se gjeti sendet e saj personale të shpërndara nëpër banesë.
Brooke pretendon se u “godit fort në fytyrë dhe u sulmua” kur iu lut atij t’ia kthente pasaportën.
Ajo thotë se kishte frikë për jetën e saj dhe e goditi me thikë pasi kapi një thikë kuzhine që ndodhej pranë saj, duke vepruar në vetëmbrojtje.
