Një nga figurat më famëkeqe të kartelit të drogës në Meksikë, Ismael “El Mayo” Zambada, do ta kalojë pjesën tjetër të jetës në burg, ka vendosur një gjykatës amerikan, dy vjet pasi Zambada u soll në SHBA përmes një operacioni të sofistikuar të kurdisur.
76-vjeçari, i cili themeloi kartelin e dhunshëm Sinaloa së bashku me Joaquin “El Chapo” Guzmán, u urdhërua gjithashtu të paguajë 15 miliardë dollarë.
Në vitin 2024, djali i El Chapos e bëri Zambadan të besonte se po udhëtonin në veriun e Meksikës për të inspektuar pista ajrore ilegale, por avioni i tyre në vend të kësaj u ul në Teksas, ku ai u arrestua.
Vitin e kaluar, Zambada arriti një marrëveshje për pranimin e fajësisë dhe pranoi akuzat për kontrabandë droge dhe komplot, në këmbim të shmangies së dënimit me vdekje.
Të hënën, gjykatësi federal amerikan Brian Cogan e dënoi Zambadan gjatë një seance në gjykatën federale në Bruklin. Pranimi i fajësisë së tij parashikonte dënim të detyrueshëm me burgim të përjetshëm, raportoi Reuters.
Shuma prej 15 miliardë dollarësh që ai duhet të paguajë përfaqëson fitimet nga trafikimi i drogës gjatë kohës kur ai ishte udhëheqësi kryesor i një organizate kriminale, sipas Departamentit të Drejtësisë.
Djali i El Chapos, Joaquin Guzmán Lopez, gjithashtu u arrestua në korrik 2024 dhe është deklaruar fajtor për akuza federale të drogës. Ai ende nuk është dënuar.
Në marrëveshjen për pranimin e fajësisë, Zambada pranoi zyrtarisht rolin e tij në krijimin e rrjetit të gjerë kriminal, i cili ka dërguar sasi të mëdha kokaine dhe drogash të tjera në SHBA që nga themelimi i kartelit Sinaloa në fund të viteve 1980, raporton BBC.
