Kapiteni i Francës, Kylian Mbappe, ka deklaruar se tani është sulmuesi i katërt i zgjedhur te Real Madridi, pasi trajneri Alvaro Arbeloa e la jashtë formacionit titullar në fitoren 2-0 ndaj Real Oviedo të enjten.
Francezi, i cili mungoi në humbjen 2-0 të së dielës nga Barcelona dhe u fishkëllye nga tifozët e tij pas rikthimit nga një dëmtim në kofshë, doli nga stoli në minutën e 68-të pasi Arbeloa zgjodhi të luante me Vinicius Junior dhe Gonzalo Garcia në sulm.
Mbappe u tha gazetarëve se gjendja fizike nuk ishte problem.
“Jam 100% mirë. Nuk kam luajtur sepse për trajnerin kam qenë sulmuesi i katërt në skuadër pas (Franco) Mastantuono, Vini dhe Gonzalo,” tha ai.
“Isha gati të filloja, është vendimi i tij dhe gjithmonë duhet respektuar. Nuk kam asnjë problem me Arbeloan. Duhet ta pranosh filozofinë e trajnerit dhe unë duhet të bëj më mirë për të luajtur përpara Vinit, Gonzalos dhe Mastantuonos.”, shtoi Mbappe.
Mbappe është përballur me kritika nga tifozët për udhëtimin drejt Sardenjës ndërsa po rikuperohej nga lëndimi, megjithëse tha se klubi e kishte autorizuar udhëtimin.
Arbeloa tha se nuk kishte asnjë mënyrë që ai të mund ta inkuadronte Mbappen nga fillimi pasi ai humbi ndeshjen e Barcelonës dhe hodhi poshtë sugjerimin se i kishte thënë francezit se ishte zgjedhja e katërt.
“Pata një bisedë me të para ndeshjes dhe nuk e di se çfarë mund të kishte interpretuar ai”, u tha spanjolli gazetarëve.
“Për mua është shumë e qartë se një lojtar që katër ditë më parë nuk mund të ishte në stol (kundër Barcelonës), sot nuk duhet të luajë si titullar. Sidomos sepse nuk është finale, nuk është një ndeshje për jetë a vdekje”, sqaroi Arbeloa.
Arbeloa shtoi se Mbappe do të jetë titullar në ndeshjen e radhës të Realit kundër Sevillas të dielën.
