Një gjykatë në Pakistan akuzoi të shtunën një burrë për vrasje, pasi ai qëlloi për vdekje një adoleshente influencuese të rrjeteve sociale para shtëpisë së saj më herët këtë vit, pasi ajo kishte refuzuar ofertën e tij për miqësi.
Gjykatësi Mohammad Afzal Majoka në kryeqytetin Islamabad ngriti aktakuzën ndaj Umar Hayat për vrasjen e 17-vjeçares Sana Yousuf. Hayat, 22 vjeç, krijues përmbajtjeje në TikTok, u arrestua në qershor në qytetin lindor të Faisalabadit.
Hayat mohoi akuzën, tha një zyrtar i gjykatës për Associated Press, duke folur në kushte anonimiteti pasi nuk ishte i autorizuar të fliste për mediat.
Yousuf, me origjinë nga rajoni piktoresk verior i Chitralit, njihej për promovimin e muzikës dhe veshjes tradicionale chitrali në kanalin e saj në TikTok. Ajo gjithashtu ishte një zë në mbështetje të arsimit për vajza. Pak orë para vrasjes, ajo kishte postuar një foto festimi për ditëlindjen me miqtë.
TikTok gëzon popullaritet të madh në Pakistan, falë formatit të tij të thjeshtë dhe vizual, me dhjetëra miliona përdorues. Por platforma është përballur edhe me ndalime të përkohshme.
Qeveria e ka pezulluar disa herë aplikacionin, duke cituar shqetësime se promovon përmbajtje imorale ose të paligjshme.
