Linjat ajrore dhe aeroportet evropiane i bënë thirrje Komisionit Evropian që të pezullojë sistemin e ri biometrik të kontrollit kufitar gjatë sezonit kulmor të pushimeve verore, duke paralajmëruar se vonesat e gjata po shkaktojnë kaos në aeroporte dhe po detyrojnë disa avionë të nisen me gjysmën e vendeve bosh.
Në një letër drejtuar presidentes së Komisionit Evropian, Ursula von der Leyen, organizatat ACI Europe, Airlines for Europe (A4E) dhe Shoqata Ndërkombëtare e Transportit Ajror (IATA) kërkojnë që aeroporteve t’u lejohet të pezullojnë kontrollet biometrike kur numri i udhëtarëve tejkalon kapacitetet e pikave kufitare.
Sipas tyre, pasagjerët po përballen me pritje deri në pesë orë në kontrollet kufitare, ndërsa disa janë detyruar të presin jashtë terminaleve ose në pistat e aeroporteve për shkak të pamundësisë së autoriteteve kufitare për të përpunuar fluksin e udhëtarëve, raportoi “The Guardian”.
Përveç radhëve të gjata, disa avionë janë vonuar në nisje duke pritur pasagjerët që mbetën në kontrollet kufitare, ndërsa të tjerë janë detyruar të nisen pa ta.
Sistemi i ri, i cili po zbatohet gradualisht që nga tetori i vitit të kaluar, kërkon që shtetasit e vendeve jashtë Bashkimit Evropian të regjistrojnë gjurmët e gishtërinjve dhe fotografinë e tyre në aeroportin e mbërritjes.Megjithatë, zbatimi i tij është shoqëruar me vështirësi në disa vende. Greqia ka pezulluar kontrollet biometrike për udhëtarët britanikë deri në shtator për të shmangur bllokimet gjatë verës. Në maj, policia franceze ndërpreu përkohësisht kontrollet shtesë në portin e Doverit, ndërsa javën e kaluar drejtuesit e aeroporteve të Romës paralajmëruan se edhe ata mund ta pezullojnë sistemin për udhëtarët jashtë BE-së për të shmangur krizën gjatë sezonit veror.
Organizatat e sektorit paralajmërojnë se disa udhëtarë ndërkombëtarë tashmë po rishqyrtojnë planet për të vizituar Evropën për shkak të pritjeve të gjata në kufi, duke dëmtuar turizmin dhe reputacionin e Bashkimit Evropian si destinacion udhëtimi.
Sipas tyre, aeroportet evropiane pritet të përpunojnë rreth 40 milionë pasagjerë më shumë gjatë muajve korrik dhe gusht krahasuar me dy muajt e mëparshëm, çka pritet ta rrisë edhe më tej presionin mbi sistemin kufitar.Kërkohet që mundësia për pezullimin e përkohshëm të kontrolleve të mbetet në fuqi derisa autoritetet të sigurojnë personel të mjaftueshëm dhe pajisjet automatike të funksionojnë në mënyrë të besueshme.
