Ushtarët amerikanë thanë se kanë rrëzuar katër “dronë sulmues njëpërdorimësh” iranianë që u nisën drejt Ngushticës së Hormuzit, duke shtuar se dronët “paraqisnin një kërcënim të menjëhershëm për trafikun detar në rajon”.
Forcat amerikane “më pas goditën vendet e radarëve të vëzhgimit bregdetar iranian në Goruk dhe në Ishullin Qeshm për t’u mbrojtur nga sulme të tjera”, thuhet në një deklaratë të Komandës Qendrore të SHBA-së (Centcom).
Irani reagoi duke qëlluar me raketa balistike ndaj dy bazave ajrore amerikane në Kuvajt dhe ndaj objekteve të Marinës amerikane në Bahrain, raporton agjencia shtetërore iraniane Irib, shhkruan BBC, transmeton Klankosova.tv.
Centcom tha se vlerësimet fillestare treguan se nga shtatë raketat iraniane të lëshuara ndaj dy shteteve të Gjirit, gjashtë u interceptuan dhe një nuk arriti të godiste objektivin.
Ky incident ndodh disa ditë pas shkëmbimit të sulmeve midis SHBA-së dhe Iranit, në një eskalim që kërcënoi një armëpushim të dobët mes dy vendeve.
Një person u vra dhe më shumë se 60 u plagosën në sulmet me dron iranian ndaj aeroportit ndërkombëtar të Kuvajtit të mërkurën, thanë zyrtarët lokalë.
Trupat e Gardës Revolucionare Islamike të Iranit (IRGC) mohuan përgjegjësinë për sulmin ndaj aeroportit, duke pretenduar se dëmet ishin shkaktuar nga një gabim i një interceptori amerikan të raketave.
Centcom e quajti këtë të pavërtetë dhe tha se Irani kishte goditur aeroportin në një “sulm të qëllimshëm, të llogaritur dhe të pajustifikuar”.
