Gjashtë persona kanë humbur jetën pasi një avion i vogël privat u rrëzua pak pas ngritjes në Statesville, Karolina e Veriut, i tha CNN-it një burim i informuar mbi aksidentin.
Aksidenti ndodhi pak pas orës 10:15 të mëngjesit, i tha CNN-it zëvendësshefi i Qarkut Iredell, Bill Hamby.
Informacionet paraprake tregojnë se gjashtë personat e vrarë në aksident — një pilot dhe pesë të tjerë — ishin në bord, i tha CNN-it një burim i informuar mbi ngjarjen. Një burim federal me njohuri për aksidentin i tha CNN-it se një person i lidhur me NASCAR ndodhej në avionin që u rrëzua.
Guvernatori i Karolinës së Veriut, Josh Stein, tha se lajmi për aksidentin ishte “zemërthyes”. “Zemrat tona janë me ato familje,” tha Stein, duke shtuar se nuk ka mënyrë më tragjike për të nisur sezonin e festave.
“Një Cessna C550 u rrëzua gjatë uljes në Aeroportin Rajonal të Statesville në Karolinën e Veriut rreth orës 10:20 të paradites sipas kohës lokale, të enjten, më 18 dhjetor. FAA dhe Bordi Kombëtar i Sigurisë së Transportit do ta hetojnë aksidentin. NTSB do të udhëheqë hetimin dhe do të japë çdo përditësim,” i tha Administrata Federale e Aviacionit CNN-it.
Një dëshmitare që punon në aeroport i tha CNN-it se pa avionin në flakë pas aksidentit.
“Tavolina ime është përballë vendit ku ndodhi. Po rrija ulur këtu dhe pastaj dëgjova një shpërthim të fortë, dhe hangari ynë u drodh pak. U ngrita për të parë dhe atëherë pashë flakë dhe zjarr kudo,” tha Victoria, e cila punon për një kompani aviacioni dhe kërkoi të identifikohej vetëm me emrin e saj të parë për arsye privatësie.
Sipas një postimi në X, pritet që NTSB që po heton aksidentin të mbërrijë më vonë sonte dhe të mbajë një konferencë për media nesër.
