Shkencëtarët në Universitetin e Cambrige kanë zhvilluar një vaksinë inovative me ndihmën e inteligjencës artificiale, e cila mund të ofrojë mbrojtje kundër një game të gjerë virusesh dhe potencialisht të ndihmojë në parandalimin e pandemive të ardhshme.
Sipas studiuesve, kjo është hera e parë që komponenti kryesor i një vaksine është projektuar plotësisht nga inteligjenca artificiale dhe më pas është testuar tek njerëzit, raporton BBC, transmeton Klankosova.tv.
Vaksina synon të mbrojë jo vetëm nga variantet ekzistuese të Covid-19, por edhe nga koronavirusë të tjerë që aktualisht qarkullojnë tek kafshët dhe mund të kalojnë tek njerëzit në të ardhmen.
Ekspertët thonë se vaksinat tradicionale shpesh mbeten pas ritmit të mutacioneve të viruseve, duke bërë të nevojshme përditësimin e tyre të vazhdueshëm. Pikërisht për këtë arsye, ekipi kërkimor synon të krijojë vaksina që mund të parashikojnë dhe neutralizojnë kërcënimet e ardhshme shëndetësore.
Për zhvillimin e vaksinës, studiuesit përdorën të dhëna gjenetike nga një numër i madh koronavirusësh të identifikuar përmes programeve të monitorimit global.
Këto informacione u analizuan nga inteligjenca artificiale, e cila krijoi një “super-antigjen” të aftë për të trajnuar sistemin imunitar që të njohë dhe luftojë një familje të tërë virusesh, edhe në rast mutacionesh të reja.
Testimet e para janë realizuar tek 39 persona dhe kanë pasur për qëllim verifikimin e sigurisë së vaksinës.
Një studim i dytë, me rreth 200 pjesëmarrës, pritet të japë më shumë të dhëna mbi efektivitetin e saj në forcimin e sistemit imunitar.
Edhe pse rezultatet fillestare tregojnë një reagim të moderuar imunitar, komuniteti shkencor e ka pritur me optimizëm këtë arritje.
Profesori Saul Faust nga Universiteti i Southamptonit deklaroi se teknologjia e bazuar në inteligjencën artificiale ka potencial të madh për zhvillimin e vaksinave kundër pandemive të ardhshme.
Ndërkohë, studiuesit po punojnë edhe për krijimin e vaksinave universale kundër gripit sezonal, gripit të shpendëve H5N1 dhe sëmundjeve të rrezikshme virale si Ebola.
Ekspertët vlerësojnë se inteligjenca artificiale mund të shndërrohet në një nga mjetet më të rëndësishme në kërkimet mjekësore, duke përshpejtuar ndjeshëm zhvillimin e vaksinave dhe duke ndihmuar në shpëtimin e miliona jetëve në të ardhmen.
Zyrtarët britanikë dhe drejtues të institucioneve shkencore e kanë cilësuar projektin si një sukses të madh të shkencës moderne, duke theksuar se rezultatet pozitive të fazës së parë mund të hapin rrugën për një epokë të re në luftën kundër sëmundjeve infektive.
