Ministri i Jashtëm i Izraelit, Gideon Sa’ar, hodhi poshtë një zgjidhje diplomatike për konfliktin me Iranin, mes një përpjekjeje evropiane për të frenuar përshkallëzimin ushtarak midis fuqive të Lindjes së Mesme.
Ndërsa presidenti i ShBA-së, Donald Trump, po e shqyrton mundësinë që të bashkohet me bombardimet izraelite ndaj Iranit, udhëheqësit evropianë po kërkojnë një zgjidhje diplomatike të fundit për konfliktin. Ministrat e jashtëm të Gjermanisë, Francës dhe Mbretërisë së Bashkuar, së bashku me diplomaten e lartë të BE-së, Kaja Kallas, u takuan me përfaqësuesit iranianë në Gjenevë të premten.
Megjithatë, Izraeli ka treguar pak interesim për një zgjidhje diplomatike dhe Sa’ar tha të premten se ai nuk “beson aq shumë në diplomacinë me Iranin”.
“Të gjitha përpjekjet diplomatike deri më tani nuk kanë qenë të suksesshme”, tha Sa’ar në një intervistë me rrjetin “Axel Springer Global Reporters”, anëtar i të cilit është POLITICO. “Ata zakonisht i përdorin këto bisedime për të mashtruar, për të humbur kohë”, transmeton Klankosova.tv.
Kur u pyet se çfarë duhet të bëjë Irani për një zgjidhje të negociuar të konfliktit, ai u përgjigj: “Ne nuk po merremi me negociata me Iranin” dhe përsëriti thirrjen e Trumpit për “dorëzim pa kushte”.
Sa’ar tha se evropianët nuk e ftuan atë në takimin e Gjenevës, por ai foli me ministrin e jashtëm francez për këtë dhe mund të flasë me ministrin e jashtëm gjerman më vonë të premten.
Ndërsa Izraeli ka shkatërruar disa objekte bërthamore iraniane gjatë javës së kaluar, mund të ketë nevojë për ndihmën amerikane për të zhdukur një zonë të pasurimit bërthamor iranian në Fordo, i cili është varrosur thellë nën tokë.
Sa’ar përsëriti disa herë se “Amerika do të marrë vendimet e veta” në lidhje me Iranin. Ai tha gjithashtu se sulmet izraelite kishin arritur tashmë përparim të konsiderueshëm në shkatërrimin e programit bërthamor iranian – dhe ua “shtymë për të paktën dy ose tre vjet mundësinë që ata të kenë një bombë bërthamore”, shtoi ai.
Kur u pyet se sa do të zgjasë operacioni izraelit dhe nëse ka një kufi, Sa’ar tha: “Ne do të ndërmarrim veprime derisa ta përfundojmë plotësisht punën”.
Për këtë qëllim, ai këmbënguli që Izraeli nuk synon të ndryshojë regjimin në Teheran, por përkundrazi të eliminojë programet bërthamore dhe raketore. Megjithatë, zyrtarë të tjerë izraelitë e kanë kërcënuar më drejtpërdrejt Udhëheqësin Suprem të Iranit, Ajatollah Ali Khamenei.
Të enjten, Shtëpia e Bardhë njoftoi se Trumpi do të vendosë brenda dy javëve të ardhshme nëse do të urdhërojë një sulm të ShBA-së, pasi ai beson se “ka një shans të konsiderueshëm për negociata”.
Irani i është kundërpërgjigjur sulmit njëjavor të Izraelit duke qëlluar me breshëri raketash të veta në objektiva nga Tel Avivi në Be’er Sheva. Përpara bisedimeve të së premtes, Ministri i Jashtëm iranian Abbas Araghchi tha se “nuk ka vend për negociata” derisa Izraeli të ndërpresë sulmet e tij. /Klankosova.tv
The post Izraeli s’do zgjidhje diplomatike me Iranin – evropianët takohen me të dërguarin e Teheranit në Gjenevë appeared first on Klan Kosova.
