Deputeti i PDK-së, Altin Krasniqi, ka thënë se qytetarët e vendit janë duke u përballur me një mori sfidash brenda këtyre pesë viteve të fundit, duke lënë fajtore Qeverinë në detyrë të drejtuar nga Lëvizja Vetëvendosje.
Në një postim në Facebook, ai ka theksuar se pjesëtarët e Qeverisë duhet të mbahen përgjegjës, sipas tij, për dëmin pesë vjeçar që i kanë bërë vendit.
“Jemi në vitin 2025, dhe me gjithë sfidat e mëdha që ka vendi, pushteti vazhdon ta zhvendosë vëmendjen e opinionit nga realiteti, duke ushqyer propagandë dhe përçarje. Në vend që të merret me problemet e qytetarëve, kjo qeveri ka zgjedhur të ndërtojë armiq imagjinarë për të maskuar paaftësinë dhe dështimet e veta në çdo fushë”.
“Kush i ka fajet që sot kemi probleme në shëndetësi e arsim, ngecje të zhvillimit ekonomik dhe mbi 250 mijë qytetarë të larguar nga vendi? Kush e ka mbajtur Kosovën të bllokuar për 10 muaj për arsye krejt personale, duke degraduar çdo institucion dhe duke shkelur Kushtetutën e ligjet? Fajtorët janë po ata që e kanë qeverisur vendin këto pesë vite dhe për dështimet e tyre duhet të mbeten përgjegjës”, tha Krasniqi.
I njëjti ka përmendur edhe masat e BE-së që janë të vendosura ndaj Kosovës dhe pezullimin e dialogut strategjik, duke theksuar se edhe për këtë është fajtore Qeveri në detyrë.
“Prandaj, është koha të mos biem më pre e propagandës. Është koha të kthehemi te programet, vizioni dhe politikat që ndërtojnë të ardhmen tonë, të jemi të bashkuar për vendin dhe të ardhmen tonë, e jo të përçarë për interesa të ngushta politike”.
“Është koha të marrim përgjegjësinë dhe të vendosim për një Kosovë që ecën përpara. Është koha për një kryeministër që zgjidh problemet ekonomike e zhvillimore. Është koha për Bedri Hamzën, Kryeministër”, tha Krasniqi.
Kryesia e PDK-së sot do të mbajë mbledhjen e radhës të Kryesisë dhe më pas do të mbajë konferencë për media. /Klankosova.tv
The post Krasniqi: Ata që kanë qeverisur këto pesë vite të mbeten përgjegjës për dështimet e tyre appeared first on Klan Kosova.
