Kapiteni i Skocisë, Andy Robertson, do të largohet nga Liverpooli në fund të sezonit, ka konfirmuar klubi. Mbrojtësi 32-vjeçar bëhet një tjetër lojtar i profilit të lartë që largohet nga Anfield pasi Mohamed Salah njoftoi largimin e tij muajin e kaluar, raporton Daily Mail.
Roli i Robertson në suksesin e Reds në sezonet e fundit ishte vendimtar, dhe klubi njoftoi se përfaqësuesi skocez do të largohet nga Merseyside si një legjendë.
“Pas nëntë sezoneve shumë të suksesshme në Anfield, kapiteni i Skocisë do të largohet nga klubi kur kontrata e tij të skadojë këtë verë”, njoftoi Liverpool të enjten. “Ai do të largohet si një legjendë e vërtetë e Liverpoolit, duke pasur parasysh rolin kyç që ka luajtur në suksesin e klubit gjatë viteve, duke bërë 373 paraqitje deri më sot.”
Megjithatë, festimi i trashëgimisë së Robertson do të shtyhet deri në fund të sezonit, pasi lojtari me numrin 26 është plotësisht i përqendruar për të ndihmuar Reds të përfundojnë sezonin 2025/26 në mënyrën më të mirë të mundshme.
Robertson mbërriti në Anfield në vitin 2017 nga Hull City. Me Liverpoolin, ai fitoi dy tituj të Premier League, Ligën e Kampionëve, Kupën FA, dy Kupa të Ligës, Kupën e Botës për Klube, Superkupën UEFA dhe Community Shield. /Klankosova.tv
