Terras në Kosovë, takon Hamzën, Abdixhikun e Gjinin: Çfarë diskutuan?Sinjali

Raportuesi për Kosovën në Parlamentin Evropian, Riho Terras, ka qëndruar të martën në Kosovë, ku ka zhvilluar takime me krerët institucionalë të vendit dhe liderët e partive politike.

Eurodeputeti estonez, përmes një postimi në platformën sociale X, ka deklaruar se e ardhmja e Kosovës është në Bashkimin Evropian, por ka theksuar se rruga drejt anëtarësimit kërkon vazhdimin e reformave.

“Po punojmë në këtë drejtim”, ka shkruar Terras.

Gjatë qëndrimit të tij në Kosovë, Terras ka zhvilluar takime të ndara me kryetarin e Partisë Demokratike të Kosovës, Bedri Hamza, kryetarin e Lidhjes Demokratike të Kosovës, Lumir Abdixhiku, si dhe kryetarin e Aleancës për Ardhmërinë e Kosovës, Ardian Gjini.

Në takimin me raportuesin e Parlamentit Evropian për Kosovën, kryetari i PDK-së, Bedri Hamza, ka diskutuar për zhvillimet politike në vend, procesin e integrimit evropian dhe nevojën për krijimin sa më të shpejtë të institucioneve funksionale.

Hamza ka vlerësuar raportin e fundit të Parlamentit Evropian për Kosovën, duke theksuar se ai konfirmon perspektivën evropiane të vendit dhe mbështet aplikimin e Kosovës për anëtarësim në Bashkimin Evropian.

Sipas tij, Kosova nuk duhet të humbasë më kohë për shkak të krizave politike dhe vonesave në funksionalizimin e institucioneve.

“Kosovës i nevojiten institucione funksionale që marrin vendime, zbatojnë reforma dhe rindërtojnë besimin me partnerët ndërkombëtarë. Stabiliteti nuk duhet të nënkuptojë vetëm formimin e institucioneve, por edhe qeverisjen demokratike, dialogun politik dhe respektimin e Kushtetutës”, u shpreh Hamza.

Ndërkaq, në takimin me eurodeputetin Terras, kryetari i LDK-së, Lumir Abdixhiku, ka diskutuar për situatën politike pas zgjedhjeve, procesin e certifikimit të rezultateve dhe domosdoshmërinë e konstituimit të institucioneve të reja.

Abdixhiku ka theksuar se pas certifikimit të rezultateve duhet të ndërmerren hapat e nevojshëm për krijimin e institucioneve të qëndrueshme dhe funksionale, duke nënvizuar se respektimi i vullnetit të qytetarëve dhe standardeve demokratike mbetet parakusht për avancimin e vendit.

Ai ka vlerësuar gjithashtu raportin e Parlamentit Evropian, duke e cilësuar atë si mbështetje për vazhdimin e reformave, forcimin e institucioneve demokratike dhe përparimin e Kosovës në rrugën drejt Bashkimit Evropian.

Edhe kryetari i AAK-së, Ardian Gjini, ka zhvilluar takim me raportuesin e Parlamentit Evropian për Kosovën, Riho Terras.

Përmes një njoftimi në Facebook, Gjini ka bërë të ditur se gjatë takimit është diskutuar për proceset aktuale nëpër të cilat po kalon Kosova, si dhe për rëndësinë e krijimit sa më të shpejtë të institucioneve funksionale.

Ai ka theksuar se integrimi në NATO dhe Bashkimin Evropian mbetet mbi çdo interes tjetër për Kosovën, duke shtuar se AAK vazhdon të jetë e përkushtuar në këtë orientim strategjik.

“Integrimi në NATO dhe BE është mbi të gjitha interesat e tjera për Kosovën. Ashtu si gjithmonë, Aleanca vazhdon të qëndrojë fuqishëm në orientimin e saj për arritjen e këtyre caqeve”, ka shkruar Gjini.

Sipas tij, Kosova po përballet me një periudhë të vështirë si pasojë e, siç e cilësoi ai, papërgjegjësisë politike, duke përmendur humbjen e fondeve të Bashkimit Evropian, rrezikimin e proceseve integruese, si dhe sfidat ekonomike dhe institucionale.

Gjini ka falënderuar eurodeputetin Terras për punën e tij dhe angazhimin që Kosova të ecë përpara në rrugën e integrimit evropian.

“E falënderova raportuesin Terras për punën e tij dhe për insistimin që Kosova të bëjë hapa përpara në rrugën e integrimit drejt BE-së”, ka deklaruar Gjini.

Sinjali – aty ku e vërteta flet para lajmit!

/GazetaSinjali/