Plazhi Playa de Palma në Majorka u mbyll përkohësisht këtë mëngjes pasi një turiste 85-vjeçare italiane doli nga deti me një plagë në këmbë.
Incidenti ndodhi rreth orës 11:30 të paradites, dhe dëshmitarët thanë se gruaja ishte dukshëm e frikësuar dhe e shqetësuar, shkruan Mirror.
Gruas iu dha menjëherë ndihma e parë në plazh dhe më pas u transportua në një klinikë private në Palma. Sipas policisë, lëndimet ishin të kufizuara në lëkurë, pa dëmtime në indet muskulore.
Rojet e plazhit i paralajmëruan të gjithë notarët nëpërmjet një altoparlanti në anglisht që të largoheshin menjëherë nga uji.
Deti u kontrollua më pas me motorë uji, por nuk u gjet asnjë kafshë detare që mund të ishte përgjegjëse për sulmin. Rreth një orë pas incidentit, notarëve iu lejua të ktheheshin në ujë.
Incidenti ndodhi në një pjesë të plazhit të njohur si Balneario 6. Biologu detar Aniol Esteban i tha medias lokale se, bazuar në fotot e plagës, ai dyshon për një sulm nga peshku shkrepës.
Disa biologë të tjerë detarë sugjerojnë se mund të ketë qenë një sulm nga një peshk shkrepës, një specie e njohur për nofullat dhe dhëmbët e saj të fuqishëm që thyejnë guaskat.
Peshqit shkrepës normalisht jetojnë në dete më të ngrohta, por ndryshimet në rrymat e detit dhe temperaturat po sjellin gjithnjë e më shumë specie ekzotike në brigjet e Spanjës.
