Administrata Trump po udhëzon agjencitë federale të SHBA-së të rishikojnë grantet ndaj Universitetit Harvard për të mundësuar ndërprerjen ose ridrejtime të mundshme të financimit, si pjesë e përplasjes së Shtëpisë së Bardhë me universitetin më të vjetër në Amerikë.
Agjencia e Shërbimeve Qeveritare (GSA) planifikon të dërgojë një letër agjencive federale “duke u kërkuar të identifikojnë çdo kontratë me Harvardin dhe nëse ato mund të anulohen ose ridrejtohen diku tjetër”, tha një zyrtar i lartë i Shtëpisë së Bardhë, raporton BBC.
Administrata parashikon që rreth 30 kontrata, me vlerë totale prej rreth 100 milionë dollarësh, mund të jenë objekt rishikimi.
Universiteti Harvard nuk ka kthyer menjëherë përgjigje për kërkesën për koment.
Në faqen e tij zyrtare, universiteti thotë se kërkimet e tij “mjekësore, shkencore dhe teknologjike të avancuara” historikisht janë mbështetur nga qeveria federale dhe entitete të tjera.
Duke përmendur kërkimet mbi kancerin, sëmundjet e zemrës, sëmundjet infektive dhe obezitetin, faqja paralajmëron se “pa financim federal, ky punim do të ndërpritet papritur”.
Shtëpia e Bardhë nuk do të tërheqë automatikisht fondet, por do të nisë një rishikim për të vlerësuar nëse financimi që merr Harvard është kritik për administratën.
GSA do t’u rekomandojë agjencive që “të ndërpresin për arsye komoditeti çdo kontratë që e vlerësojnë se nuk i përmbush standardet” dhe të konsiderojnë ridrejtimin e këtyre fondeve tek entitete të tjera.
Një draft i letrës akuzon Harvardin për diskriminim dhe antisemitizëm si arsyetime për këtë veprim.
Një zyrtar i administratës tha për BBC-në se prerjet potenciale nuk do të ndikojnë në spitalet e lidhura me Harvardin.
Po ashtu, nëse një grant federal konsiderohet i rëndësishëm për funksionet e një agjencie të caktuar, ajo agjenci mund të kërkojë vazhdimin e financimit.
Shtëpia e Bardhë dhe Harvard janë përfshirë në një betejë politike, ligjore dhe financiare, e cila është ashpërsuar ndjeshëm gjatë dy muajve të fundit.
Kjo nuk është hera e parë që administrata përpiqet të bllokojë financimet ndaj Harvardit. Në prill, Shtëpia e Bardhë ngrirë 2.2 miliardë dollarë fonde federale, duke nxitur universitetin të padisë.
“Pse të ndërpresësh financimin për kërkime? Sigurisht, godet Harvardin, por edhe vendin sepse ky financim nuk është dhuratë,” tha presidenti i Harvardit, Alan Garber, për NPR të martën në mëngjes, para se të bëheshin publike përpjekjet e fundit për prerje.
“Ky financim jepet për universitetet dhe institucionet e tjera kërkimore për të kryer punë – punë kërkimore – që qeveria federale e konsideron si punë me prioritet të lartë,” shtoi Garber.
“Është punë që ata duan të bëhet. Ata paguajnë që kjo punë të kryhet.”
Javën e kaluar, administrata Trump gjithashtu revokoi mundësinë e Harvardit për të regjistruar studentë ndërkombëtarë ose për të pritur studiues të huaj, duke shkaktuar konfuzion masiv te mijëra studentë të prekur.
Harvard përsëri paditi administratën Trump për këtë politikë, duke akuzuar se ajo shkelte të drejtat kushtetuese të universitetit për Amendamentin e Parë dhe ligjin federal.
