Pep Guardiola ka refuzuar një ofertë të rëndësishme financiare nga Inter Miami, duke i dhënë fund spekulimeve që e lidhnin me një kalim të mundshëm në Major League Soccer dhe një ribashkim me Lionel Messin.
Sipas raportimeve të mediave spanjolle, klubi amerikan në pronësi të David Beckham kishte përgatitur një projekt ambicioz për të bindur strategun katalanas që të merrte drejtimin e skuadrës pas përfundimit të aventurës së tij te Manchester City, transmeton Klankosova.tv.
Inter Miami synonte të rikthente një nga partneritetet më të suksesshme në historinë e futbollit modern, atë mes Guardiolës dhe Messit. Dyshja kishte shkruar historinë te Barcelona, duke fituar trofe të shumtë dhe duke dominuar futbollin evropian për vite me radhë.
Megjithatë, pavarësisht interesimit serioz dhe ofertës së konsiderueshme financiare, Guardiola ka vendosur të mos e pranojë sfidën në këtë moment të karrierës së tij.
Sipas raportimeve, Guardiola po shqyrton mundësinë e një eksperience të re në futbollin e kombëtareve, një ide që e ka përmendur edhe në të kaluarën si një sfidë që e motivon dhe e tërheq për të ardhmen.
Në këtë kontekst, disa prej kombëtareve më të mëdha evropiane janë përmendur si destinacione të mundshme.
Anglia dhe Italia vazhdojnë të jenë ndër emrat që lidhen me të ardhmen e tij, megjithëse deri më tani nuk ka asnjë vendim konkret nga ana e trajnerit spanjoll.
Refuzimi i ofertës së Inter Miami-t dërgon një sinjal të qartë në tregun ndërkombëtar të trajnerëve. Guardiola nuk duket i gatshëm të marrë vendime të bazuara vetëm në aspektin financiar apo në prestigjin e një projekti, por synon që hapi i tij i ardhshëm të jetë pjesë e një plani të menduar mirë për vazhdimin e karrierës.
