Një zyrtar i lartë i Hamasit, Mohammed Nazzal, tha për Reuters se grupi synon të ruajë kontrollin e sigurisë në Gaza dhe nuk mund të angazhohet për çarmatim, duke reflektuar vështirësitë për të arritur një fund të qëndrueshëm të luftës.
Nazzal shtoi se Hamas është i gatshëm për një armëpushim deri në pesë vjet për rindërtimin e Gazës, me garanci për të ardhmen nëse palestinezëve u jepet shpresa për shtetësi. Ai mbrojti ekzekutimet publike që u kryen në Gaza, duke thënë se ishin masa të jashtëzakonshme ndaj kriminelëve përgjegjës për vrasje.
Për çështjen e armëve, Nazzal tha se nuk mund të përgjigjej me po ose jo, duke pyetur “tek kujt do të dorëzohen armët” dhe duke theksuar se diskutimet për çarmatimin përfshijnë jo vetëm Hamasin, por edhe grupet e tjera palestineze.
Izraeli, nga ana e tij, vazhdon të kërkojë çarmatim të Hamasit dhe zbatimin e planit 20-pikësh të armëpushimit, duke theksuar se grupi duhet të lirojë të gjithë pengjet dhe të respektojë marrëveshjen.
Reuters thekson se këto deklarata vijnë pak ditë pas fazës së parë të armëpushimit dhe para negociatave për qeverisjen e Gazës dhe armët e Hamasit, duke treguar hendekun e madh midis pozicioneve të palëve.
