Ushtria izraelite ka deklaruar pjesë të mëdha të Libanit jugor si zonë aktive luftimesh dhe u ka bërë thirrje banorëve të largohen menjëherë, mes përshkallëzimit të tensioneve ndërkufitare me Hezbollah.
“Të gjithë banorët që jetojnë në jug të lumit Zahrani duhet të shkojnë në veri drejt sigurisë”, tha një zëdhënës ushtarak në arabisht në platformën X, sipas deklaratës së publikuar nga ushtria izraelite.
Lumi Zahrani ndodhet rreth 40 kilometra në veri të kufirit Liban–Izrael. Në një mesazh video, zëdhënësi ushtarak paralajmëroi gjithashtu qytetarët të shmangin infrastrukturën e lidhur me Hezbollah, duke shtuar se ushtria po përgatitet për një operacion “me forcë ekstreme”.
Ndërkohë, Izraeli dhe Libani kanë një armëpushim të shpallur në prill, i cili është zgjatur dy herë, por përleshjet dhe shkëmbimet e zjarrit midis Izraelit dhe Hezbollahut vazhdojnë pothuajse çdo ditë. Hezbollahu nuk është palë në marrëveshjen e armëpushimit dhe ka refuzuar negociatat me Izraelin.
Sipas burimeve libaneze të sigurisë, sulme ajrore intensive u raportuan të mërkurën në jug dhe lindje të Libanit, përfshirë zonat përreth qytetit Nabatija. Agjencia shtetërore e lajmeve NNA raportoi gjithashtu goditje në lindje të vendit. Nga ana tjetër, ushtria izraelite njoftoi për sulme me dronë në veri të Izraelit, ku u aktivizuan sirena alarmi.
Netanyahu: Sulm ndaj komandantit të ri të krahut ushtarak të Hamasit
Kryeministri izraelit Benjamin Netanyahu dhe ministri i Mbrojtjes Israel Katz njoftuan se Izraeli ka “kryer një sulm” ndaj Mohammed Odeh, i cili përshkruhet si udhëheqës i ri i krahut ushtarak të Hamasit në Gaza.
“Odeh ishte përgjegjës për vrasjet, rrëmbimet dhe plagosjen e shumë qytetarëve izraelitë dhe ushtarëve të IDF-së”, thuhet në deklaratën e përbashkët, ku ai quhet “një nga arkitektët e masakrës së 7 tetorit”.
Autoritetet izraelite nuk kanë konfirmuar nëse Odeh është vrarë në sulm.
Burime mjekësore në Gaza raportuan se një grua u vra dhe disa persona u plagosën pas një sulmi ajror në një shtëpi në Qytetin e Gazës, por nuk është e qartë nëse objektivi ishte Odeh.
Izraeli ka konfirmuar më herët vdekjen e komandantit ushtarak të Hamasit Izz ad-Din al-Haddad në një sulm ajror, dhe sipas tij, Odeh mori drejtimin e krahut ushtarak pas vdekjes së tij, ndonëse Hamasi nuk e ka konfirmuar këtë.
“Herët a vonë, Izraeli do t’i gjejë të gjithë”, deklaruan Netanyahu dhe Katz, duke përsëritur zotimin për ndjekjen e të gjithë personave të përfshirë në sulmin e 7 tetorit 2023, i cili vrau rreth 1,200 persona dhe çoi në ofensivën e mëvonshme në Gaza.
Një armëpushim është në fuqi që nga tetori 2025 mes Izraelit dhe Hamasit, por të dy palët vazhdojnë të akuzojnë njëra-tjetrën për shkelje të marrëveshjes.
